Taur: Hau Husik Fitu Rua Tanba Hanoin Povu

Thursday, 01 March 2012 12:58 Written by Domingos da Silva

Dili-MLP, Kandidatu Prezidente Republika periodu 2012-2017, Jose Maria de Vasconselo (Taur Matan Rua) husik hela nia kargu Jeneral Fitun Rua iha Forsa Defeza Timor Leste-FDTL, tanba hanoin Povu, lori Povu maka ohin loron Nasaun ida ne’e moris.

“Hau husik Fitun Rua iha F-FDTL tanba hanoin imi povu, tansa uluk fakar ran imi iha oin, maibe hisik kosar imi iha fali kotuk” hateten Taur Matan Rua iha Kanpaña dahuluk, iha Kampu Futeboll Dom Bosco, Dili Kuarta 29/2.

Tuir Taur katak uluk ita hamutuk hodi manan Independensia, tanba ne’e ikus fila fali ho povu hodi manan dala ida tan, hodi Manan Eleisaun Prezidensial.

“Uluk ami hotu jura atu servi ita nia rai to’o mate, ohin ami jura servi povu to’o mate” komenta Taur. Nia hatutan katak hakarak sai Prezidente tanba hakarak hakuak povu tomak ho hanoin dia deit, tanba ne’e it abele manan tan dala ida, tansa uluk lori mate maka sosa ita bele nusa mak lori kosar ita la bele, no ita tenki hatudu ba Mundu katak Timor Leste mos bele, Timor Leste iha Dignidade.

“Hau iha hanoin tomak hakarak lao hamutuk ho povu, lori povu ba future hodi halo dezenvolvimentu ba oin” Informa Taur.

Eis Komandante Fitun Rua ne’e hatutan katak karik povu fo fiar hodi manan iha eleisaun Prezidenzial, no hamutuk ho povu sei ke’e hofo sira ne’e sai tetuk hotu, tanba durante tinan 36 servi ona Nasaun ida ne’e, laiha ema ida deit maka bele halao servisu ho diak, maibe ita hamutuk maka bele manan buat hotu.

“Dala ida tan hau lori hau nia forsa no kbiit tomak atu halibur povu hotu para ita bele manan tan dala ida” Komenta Taur.

Kandidatu Numeru sorteiu rua ne’e reforsa liu tan katak karik manan iha eleisaun Prezidensia iha buat balun mak halo iha tinan lima mai,  hametin Independensia, hametin Ekonomia, hametin soberania, hametin unidade no reforsa toleransia.

Kandidatu Taur Matan Ruak hanesan kandidatu Independente maibe hetan apoiu masimu husi Partidu CNRT, UDT, Undertim, no Organizasaun Rezistesia mak hanesan Fitun, Fuan Domin, Sagrada Familia, St. Antonio, Organizasaun CPD-RDTL no seluk tan Inklui Eis Petisionariu.

Iha kanpaña dahuluk Kandidatu Taur Matan Ruak nian iha Kampu Futeboll Dom Bosco Comoro ne’e hetan antusiasmu makaas husi militante no simpatizante sira kuaze 20.000 pesoas.