CIJTL/ Noticias
Sabadu, 3 husi Marsu 2012
Kampanye eleisaun prezidensial ba loron datoluk kontinua la'o iha teritoriu Timor laran tomak ho promesas husi kandidatus nain sanulu resin tolu – 13, tuir mai ne'e reportajen CJITL husi distritus.
Kandidatu Manuel Tilman kontinua nia kampanye odan matan ba odan matan liu husi tama sai merkado hali laran hodi fahe pamfletu no husu ba vendadores sira atu vota ba nia.
Tuir orariu Tilman sei kontinua nia kampanye ohin (sabdu) iha Distritu Liquica.
Kandidatu Taur Matan Ruak – TMR kontinua ho nia apoiantes bo'ot iha distritu Ermera ho apoiu mos husi veteranus distrinu ne'e inklui veteranu ho naran Ernesto Fernandes Alias DUDU, veterano ida ne'ebe hetan influensia bo'ot iha distritu ne'e. Taur iha nia diskursu politika hateten katak hanesan Timor oan hatene halo funu tenki hatene mos atu ukun nasaun Timor Leste.
Kampaña Kandidatu Prezidente husi Partidu Fretilín, Francisco Guterres “Lu-Olo” ne'ebe reprezenta husi Sekretariu Jeral Fretilin, Mari Alkatiri halo kritika maka’as ba fotografia kandidatu prezidente Independente Taur Matan Ruak ne'ebé nia fotografia uza farda militár.
Kritika moruk ne’e hato’o husiAlkatiri ne'ebé dirije kampaña prezidensiál ba kandidatu Lu-Olo, iha Distritu Viqueque, Sesta, (02/03).
Ekipa suseso ba kandidatu Francisco Xavier do Amaral ne'ebe reprezenta husi Arlindo Marcal no Hermengildo Kupa kontinua kampanye iha Maubise, Distritu Ainaro ho militantes besik atus rua.
Xavier rasik kontinua baixa hela iha Hospital Nasional Guido Valadares – HNGV, hafoin tama ba sala emerjensia iha loron 27 Febreiru liu ba.
Kandidata Maria do Ceo Lopes kontinua nia kampanye iha suku caraubalu, Distritu Viqueque ho apoiantes besik atus ida. Tuir orariu, Ceo Lopes sei kontinua nia iha Laklo, Distritu Manatuto.
Kandidata Angelita Maria Pires iha Tirilolo, Distritu Baucau halo kampanye ba apoiantes besik nain hitu nulu resin lima ho asuntu justica.
Pires hateten se karik nia sai prezidente sei sulan hotu membru Falintil Forca Defeza Timor Leste- FFDTL no Polisia Nasional Timor Leste – PNTL ne'ebe halo krime ba iha tribunal militar ne'ebe nia sei hari.
Kandidatu Jose Ramos Horta kontinua kampanye odan matan ba odan matan iha Vemase, Distritu Baucau.
Asuntu importante iha kampanye Horta nian maka hadomi dame no hakuak povu. Horta sei kontinua nia kampanye iha Distritu Ermera.
Kandidatu Francisco Gomes foin hahu nia primeiru dia ba kampanye husi odan matan ba odan matan iha Maubara, Distritu Liquica.
Gomes nia kampanye tuir mai sei hala'i iha Distritu Bobonaro. Kandidatu Jose Luis Guterres realiza nia kampanye loron rua tutuir malu iha Oekusi no hetan apoiu besik rihun ha'at.
Guterres nia kampanye hetan apoiu makas husi Jorge Teme, Sekretariu Estado Rejiaun Oekusi. Teme rasik nu'udar figura ne'ebe mos hetan influensia makas iha distritu ne'e. Kandidatu Abilio Araujo kontinua nia kampanye iha Distritu Suai no kontinua mai Mercado Maubisse, Distritu Ainaro.
Abilio iha nia diskursu hateten katak nia sei promete atu lakohi simu salariu prezidente tamba povu sei ki'ak hela, nia asuntu ida seluk mak prontu konvense Australia atu dada kadoras mai Timor Leste.
Abilio iha nia diskursu hateten katak nia sei promete atu lakohi simu salariu prezidente tamba povu sei ki'ak hela, nia asuntu ida seluk mak prontu konvense Australia atu dada kadoras mai Timor Leste.
Kandidatu Fernando de Araujo La Sama kontinua ho militantes besik rihun rua iha distritu Baucau Vila no loron tuir mai sei kontinua ba Sub Distritu Vemase parte Baucau no mos Sub Distritu Laleia, Distritu Manatuto.
Lasama kontinua hetan apoiu husi Sekretariu Jeral Mariano Assanami Sabino. (Ekipa CJITL)
Sem comentários:
Enviar um comentário