quinta-feira, 1 de março de 2012

Avo Xavier Nia Kondisaun Grave “PN Altera Lei Eleitoral Artigu 26”

Notisia Husi TVTL - Kinta kalan, 01 Fevereiru 2012

Parlamentu Nasional Kinta-feira (01/03/2012) halo alterasaun ba lei eleitoral artigu 26 ho votus unamidade iha uma fukun Parlamentu nasional, alterasaun lei ne’e bazeia ba ezizensia Prezidenti da Republika, relasiona ho kondisaun saude kandidatu Prezidenti ho numeru sorteiru 4, Francisco Xavier do Amaral oras ne’e daudaun.

Tuir kalendariu kampania Prezidensial hahu hala’o iha loron 29 fulan Fevereiru, maske nune’e, kandidatu Prezidenti da Republika Francisco Xavier do Amaral labele halo kampania tamba kondisaun saude la premiti.

Tuir Prezidenti da Republika Jose Ramos Horta, hafoin hala’o vizita ba Hospital Nasional Guido valadares (HNGV) katak, oras ne’e daudaun saude kandidatu Francisco Xavier do Amaral grave, tamba hetan moras kankro.

“Hau ba vizita ita nia Avo Xavier, Primeiru Prezidenti da RDTL, Proklamador, eis titular, avo Xavier hetan moras kankro (Bemaglino) hakat ba figado ne’e hanesan grave ona,” dehan PR Horta.

Bazeia ba artigu 26 lei eleitoral hateten, wainhira kandidatu ida mate prosesu kampania Prezidensial tenki hahu fali husi inisiu, hare ba interese nasional, hafoin Prezidenti da Republika Jose Ramos Horta halo konsulta ho Primeiru Ministru Xanana Gusmao, inklui instituisaun estadu seluk, hikus mai Prezidenti husu ba Parlamentu Nasional atu altera lei refere.

Liu husi Plenaria extraordinaria, Parlamentu Nasional kuarta-feira ne’e halo alterasaun ba artigu 26 ho votus unamidade, ho alterasaun lei ne’e ba oin maske kandidatu ida mate prosesu eleisaun sei kontinua la’o hanesan baibain.

Tuir planu alterasaun artigu refere sei hetan promulgasaun emediatu husi Prezidenti da Republika.

Sem comentários:

Enviar um comentário