“PD Prontu Koliga, CNRT Lakohi”

.Jornal INDEPENDENTE - Kinta, 19 Janeiru 2012

Partidu CNRT no Partidu PD hamosu idea deferensia, ida-idak kontinua hametin pozisaun sei la haktuk ba malu.

Partidu Demokratiku fo sai sira nia kriteriu pronto halo koligasaun ho partido boot seluk, bainhira partido ne’ebe atu halo koligasaun tenki hasai ema hirak ne’ebe uluk involve iha PD, ne’ebe oras ne’e iha partidu seluk, iha estrutura Governu no Parlamentu Nasional.

Maibe, Pozisaun CNRT kontradis ho PD nian, katak lakohi halo koligasaun ho partidu sira seluk, tanba koligasaun halo ulun moras, realidade hatudu iha ukun Governu AMP nian.

Aliende ne’e, kriteriu seluk mos PD lakohi Presidenti ida ne’ebe seidauk iha fe’en kaben, maibe CNRT hili kulker kandidatu ne’ebe independente.

Ba kestaun ne’e, Adjuntu Sekretariu Jeral CNRT dehan,” Ami (CNRT) sei la hakruk ba ema seluk nia kriteriu, ami iha ami nia rasik,” deklara Duarte ba Independente horsehik iha Parlamentu Nasional.

Nia hatutan, desijaun ne’ebe CNRT foti mak iha prosesu nomeasaun ba membru governu sei dependente ba Primeiru Ministru hodi hili ema ne’ebe iha kapasidade.

Aliende ne’e, antes ne’e mos Presidenti Partido CNRT Xanana Gusmao hatete, nia lakohi halo koligasaun ona iha futuru, tanba esperensia tinan 5 AMP ukun iha problema barak.

“Konferensia ne’ebe iha, nia (Xanana) hatete, hau lakohi tan koligasaun,” dehan Ramos Horta hodi asaran PM Xanana nia lia fuan.

Ho hanoin PM xanana nian ne’e, Horta dehan, importante maka iha eleisaun Jeral 2012 tenki iha partidu ida manan maioria klara no lider sira ne’ebe manan duni husi povu nia konfiansa.

.