Lu-Olo Avansa Ba PR Maibe sei hein “CNRT Nia Decizaun”

Jornal Independente - Kinta, 05 Janeiru 2012

Presidenti partidu FRETILIN, Francisco Guterres ‘Lu-olo’ pontu ona atu avansa ba kandidatu prezidenti republika hodi halo kompetisaun ho kandidatu eis Maijor Jeneral Taur matan Ruak no kandidatu sira seluk iha eleisaun presidensial tinan ida ne’e maibe sei hein hela CNRT nia konferensia.

Iha tempo besik Comite Central FRETILIN (CCF) sei anunsia kandidatu Prezidente Francisco Guterres ‘Lu-Olo’ ba periodu 2012 to’o 2017.

Vise Prezidente FRETILIN, Arseino Paixao bano hateten, hafoin halo enkontru alargada kuaze responsavel no lideransa partidu fo apoiu no deside atu Presidenti partidu kandidata an ba Presidenti republika, maibe hein lai hodi hare tok CNRT nia decizaun, tanba karik CNRT ho nia manu aman rasik, Lu-Olo sei hanoin fila fali..

Ho desizaun altu husi CCF ne’e konvense Presidenti Partidu FRETILIN Francisco Guterres ‘Lu-Olo’ hodi pronto sai kandidatu ida iha eleisaun Presidensial oin mai.

“Presidenti FRETILIN ‘Lu-Olo’ hato’o ona nia disponibilidade ba militante tomak katak pronto atu kandidata an ba Presidente Republika,” deklara Bano horsehik ba Independente iha PN.

Tan ne’e, desizaun refere fiksu ona hodi hein de’it anunsio ofisialmente husi CCF inklui hein mos anunsio data ofisial ba eleisaun jeral oin mai.

“Tempu badak FRETILIN anunsia ona nia kandidatura, FRETILIN nudar Partidu boot tenki iha nia kandatura rasik,” hatutan nia.

Entertantu kandidatura prezidenti Republika Taur Matan Ruak ne’ebe antes ne’e deklara ona ba publiku, mosu hanoin balun katak, nia parte seidauk halo konsultasaun ba veteranus tomak, liliu lideransa rezistensia hanesan Kay Rala Xanana Gusmao.

Veterana Maria Bisoi ne’ebe durante ne’e besik liu Kay Rala xanana Gusmao (Presidente Partidu CNRT) hateten nudar veteranu ba rai ida ne’e kuaze iha ligasaun ho kontaktu ba malu, maibe nia dehan, espesifika ba kandidatu Taur nian seidauk iha konsultasaun formal ho Xanana Gusmao tanba Xanana rasik iha nia partidu.

Aliende, CCF sei avansa nia kandidatura rasik, CNRT ne’ebe lidera husi Xanana Gusmao mos sei hili nia ‘Manu Aman’ rasik ba Presidenti republika no iha kongresu ne’ebe sei realiza iha loron 7 to’o 8 mak sei deside.

Kandidatura ba Prezidenti republika sira seluk neebe mak deklara an ona ba publiku mak hanesan, Manuel Tilman, Abilio de Araujo, Fernando Lasama de Araujo, Maria Angelina Freitas.