quinta-feira, 19 de janeiro de 2012

CNRT defini de’it kritériu prezidente foun, Seidauk Temi Naran


20 de Janeiro de 2012, 09:07
 
Horseik, sekretáriu jerál husi partidu Conselho Nacional de Reconstrução de Timor (CNRT, atuál governu), Dionísio Babo haktuir katak, sira sei hatudu ba sira ninia militante kona-ba kritériu hodi hili prezidente ba tinan 2012 nian ne’ebé sira sei la temin ema ne’e nia naran.

Tuir sekretáriu husi partidu CNRT katak, iha konferénsia nasionál ne’ebé hala’o iha inisiu fulan Janeiru liu ba sira desidi ona katak, kandidatu ida ne’ebé atu sai nu’udar prezidente Timor-Leste nian, tenke ser ema ida ne’ebé independente, nia tenki iha kbi’it kona-ba jestaun polítika nó nia mós tenki modera instituisaun demokrátika hothotu ne’ebé halo parte ba Estadu.

“Iha konferénsia nasionál ne’ebé ami ninia partidu hala’o iha loron 7 nó 8 fulan Janeiru liu ba, ami desidi ona katak CNRT sei la fó apoiu ba kandidatu ne’ebé mai husi partidu seluk, maibé sei fó apoiu ba kandidatu independente”, tenik Dionísio Babo ba ajénsia Lusa.

Kandidatu ne’ebé hili husi ami ninia partidu ne’e tenki iha mós “kbi’it atu reprezenta nasaun Timór ne’e ba mundu, tenki iha sentidu nasionalizmu ho patriotizmu nó kandidatu refere tenki komprende kona-ba papel governu nó opozisaun nian”, hatutan tan Babo.

“Buat hirak ne’e mak sai nu’udar kritériu ne’ebé ami desidi durante hala’o konferénsia nasionál iha tempu ne’ebá nó ho kritériu hirak ne’e mak ami sei orienta militante husi ami ninia partidu hodi hili sira ninia kandidatu”, esplika Dionísio Babo.

Tuir sekretáriu jerál husi partidu CNRT ne’e katak, oras ne’e daudaun sira ninia partidu sei la fó sai naran husi kandidatu ruma.

“Karik sei hala’o tan segunda volta, mak partidu CNRT sei tetu hikas fali kona-ba pozisaun refere nó sei haree atu hili opsaun ida ne’ebé di’ak liu ba Estadu nó ba mós povu”, hatutan tan Babo.

Bainhira ajénsia Lusa husu hodi haktuir katak militante husi partidu CNRT barak fó sai katak partidu CNRT sei fó apoiu ba jenerál Taur Matan Ruak, nó Dionísio Babo hatan fali, nia komprende.

“Membru hothotu ne’ebé halo parte iha estrutura nivel baze husi partidu CNRT nian mesak ema husi tempu rezisténsia armada nó klandestina nian de’it, tanba ne’e mak sira iha ligasaun íntima nó emosionál ba figura balun ne’ebé mós kandidata-aan atu hodi sai hanesan prezidente repúblika ba tinan oin mai”, haktuir Dinísio Babo.

Tuir Dionísio Babo “CNRT respeita ba pozisaun husi estrutura baze hirak ne’e, maibé tuir pozisaun formál husi partidu refere seidauk fó sai kandidatu ruma nia naran, ba eleisaun husi primeira volta”.

Iha loron 17 fulan Marsu, Timor-Leste sei hala’o eleisaun prezidensiál.

Ema hirak ne’ebé fó sai ona sira ninia kandidatura ba eleisaun prezidensiál nian mak hanesan, Taur Matan Ruak, nu’udar eis-xefe Forsa Armada, prezidente parlamentu, Fernando Lasama de Araújo ne’ebé hetan apoiu husi Partidu Demokrátiku (PD) nó Manuel Tilman, nu’udar deputadu ne’ebé hetan apoiu husi partidu KOTA (União dos Filhos Heróicos da Montanha).

Atuál prezidente, José Ramos Horta seidauk fó sai ba públiku, karik Nia sei kandidata hikas fali ninia-aan hanesan prezidente repúblika ba tinan oin mai ká la’e.

Lusa/Fim

Sem comentários:

Enviar um comentário