quarta-feira, 30 de novembro de 2011

Mari Alkatiri tauk Xanana maibe ataka no kritika CNRT, tanba sei impata nia ambisaun politika


Dili, 30 Novembro 2011

Mario Ataide

Iha Jornal Nacional Diario, Kuarta-feira, 30 Novembru 2011, Mari Alkatiri halo atake makaas ba Partido Congresso Nacional da Reconstrução de Timor (CNRT), hodi tenta hafahe Presidente CNRT no actual PM RDTL Xanana Gusmão, hosi nia partido rasik.

Leitura ida né Mari Alkatiri halo bebeik ona, ho intensaun atu enfrakese CNRT, iha okaziaun oin-oin, tanba nia hatene katak CNRT agora forte tebes, no sei sai ameasa politika ba FRETILIN rasik iha oleisaun tuir mai. Iha Jornal Diario ne Mari Alkatiri hatete:

FRETILIN mak iha ema jerasaun oi-oin deit, jerasaun rua tolu ne’e hotu, sira seluk ne’e partidu foun hotu, Xanana, CNRT ne’e la’os Partidu, CNRT ne’e mak Xanana no ema sira ne’ebe mak tabele ba Xanana ne’e mak CNRT, mas la’os Partidu Politiku, kuandu aban bainrua CNRT ne’e xanana Husik, mak CNRT monu, monu hanesan karta be ita joga ne’e, so FRETILIN deit mak bele garante estabilidade,” informa Mari Alkatiri”.

Leitura ida né hatudo deit preokupasaun Mari Alkatiri nian tanba nia akompanha potensia nebe CNRT iha dadaun iha kampo. Maske Xanana la tun rasik ba karaik iha konsolidasaun CNRT nian nebe halao iha fatin-fatin, ema rihun ba rihun mak sempre partisipa hodi apoia CNRT, hosi lorosae to loromonu.

Konsolidasaun sira halao ona no hatudo bebeik iha TVTL no media seluk, sai nudar sasukat boot ida ba FRETILIN katak sira sei hetan problema iha eleisaun geral iha 2012, liu-liu tanba CNRT konsolida makaas tebes.

Mari Alkatiri tauk CNRT sei mossu hanesan forsa politika ida boot liu iha Timor-Leste no sei taka dalan ba FRETILIN iha eleisaun tuir mai. CNRT nia abut metin ona iha sosiedade Timorense nia laran, maske aban bainrua kuandu Xanana Gusmao laiha ona, CNRT sei buras ba nafatin, tanba Xanana nia hanoin, nia vizaun politika no planu nebe diak atu hadia nasaun kontinua buras nafatin.

Ho kritikas no atakes no esforsu negativu oin-oin hosi Alkatiri ho nia maluk sira atu hatun CNRT, partidu CNRT hakaas aan liu tan no komessa boot liu tan ona, tanba buat sira ne hotu mossu nudar dezafiu boot nebe partido CNRT agora komesa enfrenta. Iha partidu CNRT rasik, maioria veteraus sira mak konstitui estrutura hasi Nasional to iha baze.
Mari Alkatiri preokupadu ho kadeira (poder) iha eleisaun tuir mai, maibe CNRT sei la fo fatin ba nia ho FRETILIN ala Alkatiri ka BP-7, no sei esforsa makaas liu tan hodi tau Mari ho nia maluk sira hotu hein iha fileira ikus. 

Preokupasaun Mari Alkatiri nia iha leten, hatudo deit GRANDEZA Xanana nian, no hatudu mos katak nia rasik rekonhese katak nia la vale buat ida iha Xanana nia oin, inkluindu nia partidu rasik. Tanba enkuantu Xanana sei iha politika, Mari serve deit atu ba opozisaun, no sei laiha oportunidade atu bele manaan eleisaun, kuantu mais hetan pasta ka poder/kadeira.

Preokupasaun Mari Alkatiri nian né mos hatudu katak, Mari tenta hela atu hatun CNRT hodi fo esperansa ba nia maluk sira iha partido, mais nia la hatene katak, enkuantu Xanana sei moris no sai Presidente CNRT, partidu ne rasik kontinua buras no boot ba bebeik, no sei sai boot liu tan. Xanana nia hanoin, valores no klalaok sei moris nafatin iha CNRT nia aktividade hotu nudar objektivu politiku iha futuru.

Tanba né CNRT sei moris nafatin, no sei forte liu tan, no sei la fo dalan ba Mari Alkatiri atu bele sae ba poder. Boa Viagem Senhor Mari Alkatiri hosi palku politiku Timor Leste.