quarta-feira, 15 de junho de 2011

Media Parpol la edukativu: Deputado CNRT kestiona ba Radio Maubere FM 99.9

Dili. Presidente Komisaun B Parlamento Nasional (PN), trata ba asuntu Defesa, Seguransa no Relasoens Externa, Duarte Nunez oberva katak, existensia media Partido Politiku nian iha Nasaun ne’e la edukativu, tanba informasaun ne’ebe sira publika temi Governu AMP de faktu no laiha balansu pozitivu mak barak.

“Quando mosu tan Média sira ne’ebe husi Partidu Politiku (Parpol) ita hare ida ne’e ita muda tiha situasaun iha komunidade nia let, ita buka soran militante sira. Tanba media maka agora funu hela. Hau preokupa ho situasaun ne’e”, dehan Duarte Nunez iha plenariu segunda-feira (13/06/2011). Tenik tan Duarte Nunez, wainhira rona media Parpol la edukativu . Nia dehan tan, papel Média nian maka divulga no fahe informasaun publiku ho kredivel no balansu, la bele hare deit husi parte ida e ofende fali parte seluk.

“Ida ne’e maka akontese, ita komesa prepara ona ita nia militante sira eventu ne’ebe mai ne’e ho ladiak”, afirma Duarte Nunez.

Tuir nia PN quase la iha nia funsaun, maibe Média sira maka ataka malu ho liafuan kroat. Nia dehan povu sira hahu haluha ona, wainhira deputadu sira hakilar malu, povu iha karaik la baku malu, agora ho Média ne’e mosu, hahu hamosu fali hanoin ida ladiak iha militantes sira , ida ne’e maka kontinua estraga”, haktuir Duarte.

Tuir nia iha Konstituisaun RDTL, artigu 41-42 define klaru katak, iha liberdade ba imprensa no liberdade ba espresaun.

“Maibe ita nia Lei especifiku la iha hodi regula media, hau hanoin dalaruma ita sei hasoru problema fila fali, ita hotu tenki preokupa situasaun seguransa iha ita nia rai ne’e,” afirma Duarte.

Entretanto Deputadu bankada CNRT, Natalino dos Santos hateten, Rádio Maubere ne’ebe FRETILIN harii fo sai programa destrutivu liu no laiha karakter konstrutivu.

“Radio Maubere ne’ e ninia kritika maka la konstrutivu, destruitivu liu, ida ne’e hau sente triste tebe-tebes nudar ema FRETILIN nia oan, terus mos ba rai ida ne’e”, deklara Deputadu Natalino dos Santos.

Forum Haksesuk (FH), liu husi editorial mos kestiona konaba existensia Radio Maubere FM 99.9 ne’e hodi ható lian litik, "Radio Maubere FM 99.9: Atu Desenvolve ka kria instabilidade?" (FH, 07/06/2011)!

Fontes:
Jornal Nacional Diário (JND), edisaun Tersa-Feira (14/06/2011) pajs.1 e 15!

Besik Elisaun CNRT Hamanas Tenda iha Aileu no Fretilin iha Vikeke


Tempo Semanal, 06/06/2011

Elisaun jeral hahu hakbesik aan daudaun mai fali Timor Leste ho kompetisaun ba hamlaha poder sira hahu hamanas fali daudaun povu ninia kakutak no sukit povu nia fuan.

Partidu CNRT hala’o ninia konsolidadsaun iha distritu aileu hodi haberan lia promesas ukun mesak ne’ebe lanca ona husi Prezidenti partidu refere iha centru konvensaun Dili iha momentu balun liu ba.

Iha konsolidasaun refere CNRT sorte boot tan ba mosu afiliasaun husi simpatisantes ho apoiantes partidu sira seluk ba partidu lidera husi pm Xanana ne'e.

Deonisio Babo Sekretariu Jeral partidu CNRT dehan ninia partidu nia odamatan nakloke hela hodi simu ema ne’ebe maka hakarak atu hamutuk hadiah nasaun ne’e maibe husu atu sira entrega hikas sira nia kartaun ne’ebe simu ona husi partidu ida uluk ka entrega ba CNRT antes partidu refere foo fali kartaun CNRT ba ema hirak ne’ebe hakarak nakfilak aan ba CNRT.

Iha dsikursu vice Prezidenti Partidu CNRT, Vergilho Smith dehan partidu CNRT mosu atu liberta povu ai leva.

Iha parte seluk vice Prezidenti Partidu Fretilin foo tomada de pose ba estrutura joventude Fretilin iha Baha Harewain iha Distritu Vikeke.

Tuir Arsenio Bano katak ho estrutura ne’ebe iha maka servisu partidu Fretilin ninian iha nivel baze sei diak liu tan hodi hetaan apoiu liu tan husi kuadru sira iha nivel suku ninian, atu bele hakbesik aan liu tan ba militantes sira.

Tuir observador balun siik katak Fretilin ho CNRT maka sai hanesan partidu ne'ebe sei raut votus barak liu iha elisaun 2012 nune'e duni partidu rua ne'e maka sei hadau malu hodi kaer Governu. Iha fali sorin mosu mos rumores katak CNRT ho Fretilin sei tenta atu kazamentu iha governasaun mai ne'e maske dala barak ona lideransa partidu rua ne'e koko atu nega informasaun kona ba koligasaun ne'ebe karik mosu.