segunda-feira, 13 de junho de 2011

PD Nia Konsiderasaun ba FRETILIN Nu’udar Movimentu Libertasaun Nasional

PD Nia Konsiderasaun ba FRETILIN Nu’udar Movimentu Libertasaun Nasional

Dili – Partido FRETILIN, liu hosi ninia Sekretariu-Jeral, sr. Mari Alkatiri, halo reaksaun maka’as liu hosi komunikadu ba imprensa (07/06/2011) katak, “P.D. LA IHA MORAL POLITIKU TEMI FRETILIN NIA NARAN HODI HALO POLITIKA BARATU”, tamba Prezidente PD, Fernando La Sama promte ba populasaun iha Lakluta katak, kuandu PD manan iha eleisaun tinan 2012 mai, PD sei harii Monumento ba Movimento de Libertasaun Nasional – FRETILIN.

Hatan ba komunikadu imprensa Partido FRETILIN nian, José Nominando Buras, Vise-Prezidente PD, afirma katak, “PD iha konsiderasaun boot ba FRETILIN nu’udar Movimentu Libertasaun Nasional. FRETILIN nu’udar partidu, PD la preokupa, maibe PD preokupa maka FRETILIN ida nu’udar Movimentu ba Libertasaun Nasional. FRETILIN ida partidu ne’e sr. Mari Alkatiri nian duni, maibe FRETILIN ida Movimentu ne’e ita hotu nian, ita hotu uluk halo parte movimentu ne’e hodi funu ba ukun-an, tamba ne’e sr. Mari Alkatiri, la iha direitu atu reklama ba an mesak. Lia loos maka ne’e, FRETILIN Movimentu ita hotu nian, FRETILIN Partido sr. Mari Alkatiri nian duni”, afirma Buras.

Buras, ex-deputado hosi PD iha lijislatura ba dala uluk (2001-2007), haktur tan katak, ” FRETILIN nu’udar partidu ninia pozisaun hanesan mós partidu seluk ne´ebe regula husi Lei Partidus Politikus”. Tenik tan Vise-Prezidente PD ne’e,” Partidu FRETILIN ne´ebe lidera husi Lu Olo/Mari Alkatiri, ninia pozisaun hanesan mós PNT, PDRT, Trabalhista, PMD, PDC, no sel-seluk tan. Nune’e mós Sekretariu Jeral Partidu FRETILIN Mari Alkatiri ninia nivel, hanesan moós Sekretariu-Jeral PD, Mariano Assanami Sabino, Sekretariu-Jeral CNRT, Dionisio Babo Soares, Sekretariu-Jeral PDN, Lucas Soares no Sekretariu-Jeral Partidu sira seluk”, dehan Buras.

PD iha kompromisu boot hodi fó onra ba Movimentu Libertasaun Nasional-FRETILIN. Prezidente PD, Fernando La Sama, afirma iha konsolidasaun PD nian iha Laulara ho Lakluta katak, “Se PD manan iha eleisaun 2012, sei harii Monumentu ida no hakerek iha plaka ho naran Monumento do Movimento da Libertação Nacional-FRETILIN, atu nune´e historia labele lakon”. Haktuir José Buras, Vise-Prezidente PD, ”Mari Alkatiri lakohi monumentu istoriku ba Libertasaun Nasional ne´e tamba konsidera FRETILIN nu’udar objektu atu sai monumentu”. Tenik tan Buras,”PD onra ba movimentu istoriku nasional, tamba PD nu’udar partidu ne´ebe moris iha prosesu konstrusaun Estadu-Nasaun atu hala’o dezenvolvimentu no lori progresu ba rai ida ne´e tenki respeitu no honra ba movimentu libertasaun nasional. Monumento ne’e sei harii iha Kapital Timor-Leste nian”, sublinya Buras.

Vise-Prezidente PD, José Nominando Buras husu ba povo Timor-Leste tomak atu labele influensiadu ba diferensa opiniaun entre lider politiku sira. “Ha’u apela ba povo tamak atu labele influensiadu hosi lideransa politikas sira ninia nanal baku malu iha leten, ne’eduni PD nu’udar Partido Dame nian, husu ba povo Timor-Leste tomak atu hadomi malu, diferensa hanoin ne´e normal iha demokrasia. Mantein nafatin paz ho dame tamba ida ne’e duni maka PD defende horiuluk kedas to’o ohin loron”, dehan Buras. Depinfo.

Fonte: http://partidodemocratico.org/?p=539

Radio Maubere FM 99.9: Atu desenvolve ka kria instabilidade?*

Radio Maubere FM 99.9: Atu desenvolve ka kria instabilidade?*

Forum Haksesuk: Radio nudar meius komunikasaun ne´ebe importante ba qualquer procesu politika, ekonomika no sosial iha mundu rai klaran. Papel meius komunikasaun, liliu Radio importante tebes. Importante tamba, husi parte ida, meius ne´ebe maka facil atu komunika ho distancia ne´ebe dok. Parte seluk, meius probaganda ne´ebe efikas liu. Razaun seluk mos, radio ninia informasaun bele to´o lalais rona nain sira.

Historia funu Timor-Leste nian, hahu husi Funu uma laran 1975, protogonista husi partidu Historikas hanesan UDT ho FRETILIN, meius komunikasaun liu husi Radio ninia papel importante hodi kontribui ba ajitasaun, provoka violensia no to´o ikus massas husi partidus sira oho malu.

Molok atu tama ba Referendum, iha tinan 1999, parte Resistencia mos iha Radio ida naran Radio Matebian (RM). Objektivu husi RM oinsa maka halo kampane ba sosialasaun no mobiliza massas ba votas ba Independencia iha referendum iha loron 30 Fulan Agostu tinan 1999.

Iha kontextu Ukun Rasik An, moris ona radio barak, referencia ba RTL (Radio Timor-Leste) no RTK (Radio Timor Kmanek). Radio rua ne´e, ida estado nian tamba simu osan husi Estado. Nudar radio publika ninia misaun maka ható informasaun ne´ebe garante ba principius servisu publiku informasaun ne´ebe garante ba interesse publiku. Servisu informativu ne´ebe exije kriterius balansu ba iha ninia informasaun. Tuir RTL ninia moto ”RTL promove desenvolvimentu no harmonia sosial”. Ne´e importante, paz sosial no desenvolvimentu buka lao hamutuk, papel radio publika ne´e importante.

RTK nudar radio ne´ebe inspirasaun Kristaun Katolika, maibe nia mos obedece ba radio nudar komunikasaun sosial ne´ebe kumpri dever ba servisu publiku, respeitu ba balansu informativu.

Oras ne´e mosu RM FM 99.99, se maka rona radio Maubere, ba sira katuas hanoin fali memoria 1975 nian, ne´ebe mosu radios hodi ajita ba massas no provoka instabilidade no ikus liu maka Timor oan oho malu.

Ba jerasaun foun sira, wainhira rona RM FM 99.9, hanoin fali tinan sanulu resin rua kotuk (1999) wainhira radio nudar meius komunikasaun sosial ninia papel importante ba mobilizasaun populares ba vota independencia iha loron 30 Fulan Agosto tinan 1999.

Problema koloka maka ne´e: Radio Maubere FM 99.9: Atu desenvolve ka kria instabilidade?

Editor Forum Haksesuk!