domingo, 13 de fevereiro de 2011

Pasiente Rujuk Barak Mak Mate, Horta-Xanana Planea Halo Hospital Foun


.
Josefa Parada - Sesta, 11 Fevereiru 2011 - SUARA TIMOR LOROSAE

DILI - Prezidente Republika, Jose Ramos Horta no Primeiru Ministru, Kay Rala Xanana Gus¬mao, hahu hanoin ona dalan alter¬nativu, salva povu rai nee husi moras.
Durante tinan hirak nee go¬vernu aloka ona orsamentu ho mon¬tante nebe boot, apoiu ko¬mu¬nidade nebe hetan rujukan ha¬lo tratamentu ba estranjeiru, liu-liu ba Indonesia, Malaysia, no Singapura. Maibe la fo rezultadu nebe diak, hasai osan barak ho intensaun atu salva povu rai nee nia vida moris, realidade pasien¬te nebe hetan rujukan ba liur, fila ho kaixaun ou mate kuaze 80%, nunee Xefi Estadu ho xefi Go¬vernu planeia ona atu “sulap” Hospital antigu portugues Bali¬de, nudar hospital foun iha Ti¬mor Leste.

Premiadu Novel da Paz Hor¬ta, fo apoiu ba inisiativa Primeiru Ministru Kay Rala Xanana Gus¬mao, nian atu intrega hospital an¬tigu Portugés koñese ho naran Dr. António Carvalho, Lahane atu hari Ospitál Hope (HOH) Timor-Leste .

“Hau apou tebes governu intrega para bele tau fasilidade no rekursu sufisente, atu nunee pa¬siente sira moras bele ba halo tratamentu iha neba,” informa PR Horta ba jornalista hafoin inkon¬tru ho PM Xanana iha Palasiu Preziensia Aitarak- Laran Dili, Kinta (11/2).

Loke Hospital Foun Iha Lahane
Iha fatin hanesan, Primeiru Ministru Xanana, hatete liu husi inkontru Konseillu Ministru Kuarta (9/2) aprova ona rezolusaun ne’ebé aprova konsesaun rai ba konstrusaun Ospitál Hope.

Xefi Governu rasik hatan ona atu fó arendamentu, prazu naruk, ba antigu Ospitál Portugés nian iha Lahane nee, atu hari Ospitál Hope (HOH) hodi evita ema Timor oan nebe hetan moras labele tan ba halo trata saude iha estranjeiru.

Xanana rekonese katak, durante ne’e governu fakar osan barak hodi fasilita Timor oan sira ba trata saude iha liur, maibe ladun hetan rezultadu diak, ema mate barak liu, duke moris. “Ami sei intrega hospital Lahane ne’e, tanba ita nia pasiente barak ba trata saude iha Indonezia, Singapura dala barak ona ba tardi ituan ona to ba fila ho kaixaun halo ita mos laran susar hotu,” argumentu PM.

Kriasaun hospital foun ne’e katak PM Xanana atu evita governu labele gasta osan barak, maibe investe hikas fali osan hirak nee hodi sosa ekipamentus modernu no prepara rekursu humanus ba saude nian. “Ita tenki evita lakon osan barak, hodi kria kondisaun sosa ekipamentus tau ba hospital ne’e,” dehan PM.

Nia dehan, dala ruma mos hospital TL haruka pasiente barak nebe hetan moras grave ba Indonezia sempre mate iha aviaun Merpati laran antes tooiha Hospital. “Ami hetan ona solusaun diak, atu labele mosu bebeik problema pasiente mate iha avian Merpati laran no hospital Indonezia,” tenik PM.

Iha parte seluk, Sekretariu Estadu Konseillu Ministru, Hermegildo Agio Pereira informa katak, governu planea ona programa ne’e laós ba deit servisu saúde nian nebé mak sei hahú hala’o ba dahuluk husi profisionál Austrália nian no paíz hirak seluk, maibé mós projetu ne’e ninia objetivu atu promove formasaun profisionál ba Timor oan sira, atu sira bele hala’o jestaun HOH nian no fó providénsia liu hosi servisu klíniku hirak ne’ebé mak tenke hala’o.

Iha parte seluk, Ministeiru Solidaridade Sosial (MSS) infor¬ma katak total pasiente nebe ba trata saude iha Hospital Indonezia to agora barak hetan susesu no balun maka mate.

Iha parte seluk, Vice Ministra Saude, Madalena Hanjam informa katak, durante ne’e Ministeiru Saude mos servisu makaas hodi asina mos akordu ho hospital Darmo Indonezia nian iha Bali no Surabaya hodi simu pasiente nebe hetan moras iha TL bainhira atu halao tratamentu iha hospital hirak nee. Maibe balun konsege diak no balun mate tanba sofre moras grave.

Hanjam informa mos katak MS apoiu inisiativa PM Xanana nian hodi intrega Hospital antigu Lahante hetan rehabilitasaun hodi utiliza nudar hospital foun nebe sei sai nudar fatin ba tratamentu saude jeral ba povu Tomak.

Iha biban nee PM Xanan informa katak Konsellu Ministrus aprova tiha ona planu asaun atu harí Banku Nasionál Investimentu no Dezenvolvimentu Timor-Leste (BNIDTL). Planu asaun ida ne’e, mosu hafoin hala’o servisu hirak nebe apropriadu ba kriasaun instituisaun ida ne’e. Kriasaun Banku Nasional Investimentu nee mosu ona iha programa Governu Konstitusionál nian ba Dahaat, ne’ebé ho naran Banku Nasionál Dezenvolvimentu. “Instrumentu finanseiru ida atu apoia Modelu Dezenvolvimentu Ekonómiku Sustentadu Timor-Leste nian ida, ne’ebé mak ninia maioria kapitál ne’e, públiku,” tenik PM.

Iha parte seluk, KM mos analiza projetu Dekretu-Lei ne’ebé aprova Institutu Nasio¬nál Formasaun Kontínua no Aperfeisoamentu Profisionál Saú¬de nian (INFCAPS). Projetu ida ne’e tuir Xefi Governu, haka¬rak atu transforma Institutu Sién¬sia Saúde (ICS) iha Institutu Nasionál Formasaun Kontínua no Aperfeisoamentu ba Profi¬sionál Saúde sira, ne’ebé hetan vokasaun ba formasaun hane¬san profisionál ba saúde nian, nune’e formasaun baze nian fó ba iha estabelesimentu ensinu nian ne’ebé hetan vokasaun atu hala’o servisu ida ne’e.

Atu hanoin de’it katak, ICS, ne’ebé harii iha tinan 2005 nian, nu’udar Servisu personalizadu husi Ministériu Saúde ho nia misaun atu hala’o formasaun kontínua no ensinu superiór tékniku ne’ebé la’ós universitáriu profisionál saúde sira nian. Aprovasaun Estatutu UNTL nian, iha tinan 2010, determina tiha ona katak ICS sei muda hodi bele integra kursu hirak ho nível universidade nian iha UNTL.

Entretantu Ministériu Saúde, koalia ona kona-ba nesesidade formasaun kontínua ba ninia ema profisionál saúde nian, atu bele garante hodi hasa’e prestasaun ba kuidadu sira, bainhira atende nesesidade sira ne’ebé estratéjiku ba dezenvolvimentu sektór prazu médiu no prazu naruk, tanba ne’e mak presiza aprezenta proposta transformasaun nian ida ne’e, hodi ICS bele sai fali INFCAPS.

Ikus liu KM mos aprova projetu dekretu-lei konaba Estrutura Orgánika Ministériu Turizmu, Komérsiu no Indústria (MTCI). Besik tinan rua hafoin aprova tiha Dekretu-Lei n.º 7/2007, 4 Juñu – ne’ebé mak estabelese Orgánika MTCI nian, hafoin hakerek tiha Estrutura Orgánika Governu Konstitusionál ba dala haat no tuir kondisaun ekonómika no sosiál hirak iha tempu ne’ebá – hakarak atu ajusta estrutura organizasaun ministériu nian ba realidade foun paíz ne’e nian.

To’o oras ne’e iha duni dezenvolvimentu maka’as iha komérsiu esternu no doméstiku ne’ebé, hanesan iha turizmu, la’o maka’as liu to’o datolu. Índise hirak kona-ba indústria ki’ik no médiu ninian, liu-liu ligadu ho konstrusaun sivil sai pozitivu duni.

Nune’e, mak jestaun rekur¬su umanu no materiál nian sira ne’ebé mosu hosi responsa¬bilidade hirak foun iha abas¬te¬simentu públiku nian iha paíz ida ne’e no atu reorganiza fali lojís¬tika, kestaun hirak nee hatudu nesesidade atu reorganiza fali servisu no adapta hikas fali estrutura MTCI nian. Ego

TR Deklara OJE 2011 la Inkostitusional: FRETILIN nia Klaim ILEGAL

Josefa Parada - Sesta, 11 Fevereiru 2011 - SUARA TIMOR LOROSAE

DILI - Reprezentante povu iha uma fukun Parlamentu Nasional (PN), “orbiga” Prezidente Republika, Jose Ramos Horta, promulga lalais OJE 2011, tanba Tribunal Rekursu la deteta ona ninia Inkonstitusionalidade.
Atraza promulgasaun OJE 2011 bele afeta ba nia implementasaun, liu-liu atu responde nesesidade urjenti hanesan estrada, ponte, hamlaha no eletrisidade nebe sai preokupasaun povu nian.

Prezidente Republika, Jose Ramos Horta, diriji ona Orsamentu Estadu Jeral (OJE) 2011, ba Tribunal Rekursu (TR) hodi halo apresiasaun. Depois hetan esplikasaun husi Parlamentu Nasional nudar autor ba lei OJE 2011 nian liu husi karta resposta, tribunal rekursu deklara katak sira parte la deteta inkonstitusionalidade iha OJE 2011 tuir preokupasaun PR Horta nian. Deklarasaun tribunal rekursu nian nudar derota ba PR Horta no Fretilin.

Maske nunee desizaun PR Horta nian hodi diriji OJE ba TR, indika katak xefi estadu menus ona konfiansa ba kapasidade governu nian atu ezekuta OJE 2011. Tanba preokupasaun ema barak nian katak PR Horta atraza promulgasaun OJE 2011, bele hamosu implikasaun ba iha prosesu dezenvolvimentu iha rai laran, tanba OJE 2011 nian atu responde nesesidade urjensia povu nian.

Deputadu Arao Noe de Jesus C. Amaral (Bankada CNRT) informa katak laiha prolema tanba tuir konstituisaun RDTL artigu 115 kompetensia governu nian elabora orsamentu depois apresenta mai iha PN no PN hodi diskuti. Aprova, alteira kompetensia Parlamentu nian antes apresenta ba Presidente da Republika tuir artigu 89 konstituisaun nian atu promulga no bele veta.

Agora dadaun tenik Arao katak PR uza artigu 149 atu husu halo apresiasaun husi Tribunal Rekursu (TR) ba OJE 2011. “ Hau hanoin ita sei hela dalan legal sira hotu nebe konstituisaun haruka, agora kompetensia TR atu pronunsia konaba inskonstituisionalidade partes balun husi lei OJE 2011,” hateten Deputadu Arao Noe iha Edifisu PN, Segunda (11/2).

Deputadu husi Bakada CNRT ne’e hakarak informa mos ba publiku katak tuir jestaun finanseiru, TL iha orsamentu fundu konsiladu nebe U$ 634 miloens, osan nebe jestaun estadu no iha fundu kapital umanu no kapital infraestrutura ne’e iha U$ 300 ital miloens no mos iha alteirasaun nebe sae makas.

Inkonstituisinalidade OJE 2011 tanba PR kestiona kriasaun fundu nebe foti 10% husi fundu Petroliferu nian. “ Tuir PN, asesor no governu hare hateten katak buat legal tanba kria ho lei, lei OJE artigu 9 ami inklui iha neba para kriasaun fundu no tuir artigu 32 jestaun finanseira, kriadu por lei. Tuir ami nia persepsaun katak lei orsamentu mos ninia hirarki lei hanesan lei sira seluk,” tenik Arao.

Jestaun orsamentu tuir Arao normal planu orsamentu ida ba tinan ida ne’e komesa husi 1 Janeiru to’o 31 de Dezembru, ne’e iha nia impaktu. Sei prumulgasaun ne’e atraza ezekusaun mos atraza tanba ne’e tuir deputadu ne’e katak TL sei iha dentru limiti tanba ho orsamentu 2/2 sei bele rejolbe estadu nia ejijisensia iha bens servisu ho vensementu ba funsionariu sira nian. “Hau nia preokupa atu governu Tribunal Rekursu no PR Horta bele foti desizaun ida lalais liu atu nune’e ezekusaun ne’e bele lao, ne’e duni orsa¬mentu ba fundu konsilidu bele ezekuta ona no husu ba povu lalika preokupa, “katak Arao.

Tuir Deputadu Mateus de Jesus katak PR Horta iha kbi’it tomak atu veta orsamentu nebe iha no bele fo iha TR bele estuda tanba konstituisaun fo dalan ona PR Horta kbi’it atu veta.

Ne’e katak Mateus laos lei orsamentu inkonstituisinal, PR Horta hatama OJE ba TR dala ruma iha parte artigu balun nebe ladun fo dalan atu osan ne’e ultrapasa. “ Hau hare ne’e politika kapas ida atu todan ne’e dala ruma osan ne’e ultrapasa iha 3% ou U$ 300 ital miloens “ dehan Mateus.

PR Horta la promulga OJE tanba hakarak TR hare nia legalidade, tanba orsamentu ida ne’e atu serbi povu Timor Leste tomak.” Hau hanoin katak tendensia politik nia tenki halai husi tendensia politika karik la dun los, hau fiar nia sei promulga duni osan ne’e iha tempu badak,” katak Mateus.

Iha fatin hanesan Xefi Bankada Fretilin, Aniceto Guterres hatete, Parlamentu hatan ona karta Tribunal Rekursu nian, tanba PN hanesan outor ba lei orsamentu ida nebe agora seidauk sai lei bainhira seidauk promulga husi Prezidente Republika.
“ PR atu promulga sei iha duvida ou iha prekupasaun ruma konaba d projetu nebe Parlamentu aprova tiha ona ne’e nia (PR-Red) husu ba Tribunal atu halao apresiasaun karik iha inkonstitusionalidade ou ilegalidade nebe ema hanaran fiskalizasaun preventive” dehan Aniceto.

Lori osan ba tribunal katak Aniceto, kompetensia Prezidente Republika nian, tanba PN mak autor ba lei, tenke hetan notifikasaun husi tribunal. “ Parlamentu aprova tiha ona osan bazeia ba saida, tanba saida mak Parlamentu aprova, Parlementu tenki esplika sasan sira ne’e ba Tribunal atu nune’e Tribunal iha informasaun sufisiente atu halo desizaun tuir saida mak presidente da Republika husu,” Informa Aniceto.

Deputadu Adriano do Nascimento hatete, PN koalia ona durante iha debate orsamentu atu aumenta osan bo’ot. Tan nee povu sira katak tenke pasiensia, basaa deputadu sira hakilar iha Parlamentu sei hakilar mamuk.

Tuir fontes informasaun nebe Diario nee hetan husi governu katak tribunal rejeita pedidu PR Horta nian konsidera OJE 2011 inkonstitusional, tanba la deteta iregularidade balun iha OJE 2011 nebe parlamentu aprova. Jay