POPULASAUN PERSIZA LOKE MATAN BA LIAN RESISTENSIA

.

SUARA TIMOR LOROSAE - Opini ho Editorial

Mapa politika nasional agora persiza tebes figura konsensus, figura democrata, kalma, no hatene diak situasaun no kondisaun populasaun tomak nian luta, terus no susar durante tinan 24 nia laran.

Figura Taur Matan Ruak hatan duni kriteria hirak nee. Situasaun politika nasional hein nia duni. Desde nia hato’o karta rezignasaun ba Komandante Suprior F-FDTL no PM Xanana Gusmao, fulan Agustu 2011, no hasai deklarasaun ba publiku katak, nia hakarak kandidata a’an ba kadeira Presidenti da Republika (PR) periodu 2012-2017, pentas politika nasional simu tomak.

Potensia joventude teritoriu tomak simu kontenti. Sira prontu fo apoiu ba Taur. Apoiu politika hanesan, hato’o aberta husi veteranus da libertasaun nasional (kompostu husi Regiaun I, II, IV, no Regiaun Otonom).

Liu husi re-enkontru iha Dare, Kinta (27/10), sira hotu aseita ba eis Chefe Estado Maior General F-FDTL, Taur Matan Ruak atu kandidata a’an ba PR. Iha biban vital nee partisipa mos membru Bankada Fretilin Antonio Cardoso, Presidente Partidu UNDERTIM, Cornelio Gama alias L-7, Vise Ministru Ekonomia no Dezenvolvementu (MED), Dr. Critiano da Costa, inklui kuadru veteranus husi distritu 13.

Objectivu reenkontru nee halibur veteranus no kombatentes libertasaun tomak. Mesmu re-enkontru nee laos kampainha politika maibe nudar forum politika entre membru veteranus ba Taur. “Agora ne’e tempo re-enkontru. Tempo hodi simu fali ita bo’ot sira, hafanun fali ita nia lulik sira para hader hotu. Hafanun fali matebian sira para hader hotu, para ita hamrik hotu hodi determina dala ida tan, futuru Timor nian,” Taur esplika.

Ho “biru” ne’ebe uluk iha no uza durante funu naruk, tenki hamanas fila fali. Lulik hirak ne’ebe uluk luta nain sira uza, to’o manan ukun an, persiza uza fali para lori nasaun ida ne’e, sai nasaun ida forte no moris diak. “Ita nia servisu seidauk hotu,” reforsa Taur.

“Ukun a’an, laos buat nebe ema hotu oras nee goza dadaun. Laos ida ne’e deit maka ita dehan ukun a’an. Iha buat seluk ita seidauk hetan. Agora ita bo’ot sira hamanas fila fali biru atu lao ba oin. Labele sai penonton deit, tenki servisu maka’as nafatin, hanesan uluk ita bo’ot sira ema se’e kilat ba imi nia ibun maibe ita bo’ot sira barani hasoru hodi duni sai Indonezia. Tamba saida maka agora ita bo’ot sai falin penonton!,” reforsa Taur.

Ho situasaun sira hanesan nee, eis general fitun rua nee bolu sira: mai hamutuk fila fali ho povu tomak ne’ebe uluk servisu hamutuk. Agora mai ita servisu hamutuk tan dala ida, para lori povu nasaun ida ne’e ba dalan los.

“Ohin hau jura servisu deit ba imi. See hau buka diak, hau buka tan bintang haat tan. Agora hau hasai tiha bintang. Mai hamutuk fali ho imi iha ne’e. Ba oin, hau nia mehi ida deit: fila imi. Sai ema importante iha imi nian rai, laos orang kedua iha imi nia rai, mai imi ema ke satu iha TL,” hateten Taur.