Sekjen fo pose ba estrutura Partidu CNRT iha Suku Afaloika.

Tuesday, 20 September 2011 16:37 Written by M X

 Afaloikai- Sekretátiu Jeral Partidu Kongresu Nasional Rekonstrusaun Timor Leste (CNRT), Dionisio Babo fo pose ba estrutura Partidu CNRT iha Suku Afaloikai Subadistritu Uatucarbau Distritu Viqueque hodi kompleta estrutura Partidu nian iha baze.

Relasiona ho eleisaun jeral ne’ebé maka besik Partidu Kongresu Nasional Rekonstrusaun Timor Leste (CNRT), komesa halo konsolidasaun iha teirtóriu Timor laran ho sistema “door to door” tama sai aldeia sira teritóriu laran hodi monta estrutura Partidu nian atu alkansa objetivu iha tinan 2012.

Tuir Sekretáriu Jeral Partidu CNRT, Dionisio Babo hateten katak objetivu husi konsolidasaun no fo pose ba estrutura iha baze ne’e atu manan Vitoria iha eleisaun 2012. “Lideransa Partidu CNRT husi Nasional no hamutuk lideransa lokal suku rua  ne’e hodi konsolidasaun no prepara meta saida estrutura nasional too kraik atu esporsu aan manan vitória iha eleisaun jeral 2012” Dionisio Babo hateten ba jornalista Domingu (18/09/11)  iha Suku Afaloikai.

Bainhira Sekretáriu Jeral Partidu CNRT ne’e fo pose ba estrutura Partidu nian foun  iha Suku Afaloikai nia husu estrutura foun ne’e atu servisu liu tan iha baze no fo aan duni Partidu CNRT, “ hau husu ba ita boot sira ne’ebé tama iha estrutura Partidu nian no ita boot sira ne’ebé maka ohin simu tenke servisu maka’as liu tan no ema ida tenke dada ema nain rua hodi tama mai Partidu nia laran” tenik Sekjen.

Sekjen ne’e mos imforma tan katak lideransa Partidu husi nasional mai ko’alia ho estrutura Partidu nian no fahe programa governu nian liu-liu programa ne’ebé hanesan ho objetivu programa Partidu nian.

“Ami mai ko’alia ho estrutura Partidu CNRT nian iha baze nomos ami fahe imformasaun programa governu nian liu-liu programa sira ne’e iha relasaun ho objetivu  Partidu nian,

Primeiru ko’alia konaba objetivu sentral Partidu CNRT nian maka Dezenvolvimentu iha rai laran ne’ebé maka planu tiha ona iha Planu Estratéjiku Dezenvolvimentu Nasional (PEDN)” Sekjen Imforma.

Sekretáriu Jeral ne’e mos promete katak bainhira iha 2012 povu fo fiar ba Partidu CNRT la presiza atu tun ba kraik maibe atu implementa deit ona tamba antes ne’e Primeiru Ministru, Kay Rala Xanana Gusmão rasik maka konsulta ona ho povu sira iha teritóriu Timor laran tomak.