segunda-feira, 11 de abril de 2011

Eleisaun 2012, CNRT Fiar Aan Manan Absoluta


Josefa Parada - Sesta, 08 Abril 2011 - SUARA TIMOR LOROSAE

DILI–Ho intensaun hakarak liberta povu husi kiak, Partidu CNRT fiar aan atu manan absoluta iha eleisaun jeral 2012. Oras nee dadaun, partidu nee realiza ona programa balun iha baze nudar estratejia ida hodi garante vitoria eleisaun.

“Haree hikas ba kotuk, uluk partidu nee foin harii fulan tolu deit antes eleisaun, maibe hetan ona kadeira sanulu resin walu (18) iha Parlamentu Nasional. Agora partidu nee halo tinan haat ona. Ita haree took saida mak bele mosu iha eleisaun mai.

Partidu agora prepara aan realiza programa iha distritu sanulu resin tolu,” katak Sekretariu Estadu Asistensia Dezastre Naturais,Jacinto Gomes de Deus ba STL iha Merkadu Lama, wainhira partisipa komemorasaun loron mundial ba saude, Kinta (07/04).

Nia haktuir, agora dadaun partidu halo konsolidasaun iha baze, hanesan iha Distritu Ermera, Sub Distritu Hatulia no Rai Laku. Tempu badak sei halo ba distritu hotu. Agora estrutura partidu hamutuk ho militante sira servisu makaas atu halo kongresu nasional ba dala rua iha dia 28 Abril too dia 1 Maiu, fatin iha Merkadu Lama, nebee sei involve reprezentantes no partisipantes husi distritu hotu.

“Hau hanesan sidadaun no militante Partidu CNRT, fiar metin katak, iha eleisaun mai partidu manan mutlak (absoluta, red). Tanba partidu hakarak hasai ema husi mukit no halo dezenvolvementu ba rai nee. Partidu CNRT tuba nafatin mak too ohin loron ukun aan,” tenik Jacinto.

Tuir Jacinto, partidu nee kumpri ona prinsipiu balun hodi liberta povu, hanesan implementasaun Pakote Referendum iha Timor laran tomak. Oras nee CNRT iha nafatin komitmentu atu manan iha eleisaun hodi kaer ukun nafatin, para bele halo dezenvolvementu ba povu no rai ida nee. Nia afirma, odamatan CNRT nakloke ba ema hotu atu bele tama. Importante mak iha hanoin hanesan ho partidu atu halao programa hodi hadia povu nia moris.

Iha parte seluk, Antonio Soares nudar militante CNRT fiar mos katak, partidu nebee Kay Rala Xanana Gusmão lidera nee, sei manan absoluta iha eleisaun 2012. Iha lideransa Xanana Gusmão nian durante tinan haat, realiza ona programa balun nebee bele ajuda povu barak sai husi kiak, hanesan fahe osan ba ferik katuas sira. Needuni iha futuru, ho manan absoluta, Xanana Gusmão sei lori nafatin partidu nee ba oin, hodi hadia povu nia moris.

Alende Xefe Suku Asamuta, Andre Soares hatutan, “Durante tinan haat, governu lidera husi Kay Rala Xanana Gusmão, hau sente programa dezenvolvementu ekonomia lao, tanba hadia povu nia moris, liu-liu fo subsidiu ba ferik katuas sira, nomos fahe projetu Pakote Referendum ba emprezariu sira, hodi bele loke kampu servisu ba joven sira nebee sei nganggur hela. Needuni, hau sente iha eleisaun mai, xefe governu nia partidu sei kaer nafatin”.

Optimismu hanesan hatoo husi estudante finalista UNTL, Mario de Jesus katak, eleisaun 2012 CNRT sei ukun nafatin. “Ita haree povu barak apoia husi Partidu CNRT nia programa, nebee durante nee implementa iha distritu too area rurais. Needuni iha eleisaun mai, CNRT sei okupa kadeira barak nafatin,” nia optimista.Jef
.

Sem comentários:

Enviar um comentário