OJE 2011 , “SEI LORI MORIS DIAK BA POVO TIMOR-LESTE”

.
Timor Post - Sabadu, 15 Janeiru 2011

Dili-“Bloku Aliansa Maioria Parlamentar (AMP) iha Parlamentu Nasional salva Proposta Orsamentu Jeral Estadu (OJE) 2011 iha votasaun ba jeneralidade ho votus a favor 43, kontra 21, no abstensaun ida (1).
Bancada FRETILIN kritika makaas kona-ba OJE 2011 ho montante tokon 985 ne’ebe aprejenta ba Parlamentu Nasional no fahe ba salariu no vensimentu hamutuk tokon $11, beins de servisu tokon $270, transferensia Publiku ho montante tokon $164, capital menor ho montante tokon $28, capital dezenvolvimentu ho montante tokon $406, no ba fundu Infra-estrutura nian hamutuk tokon $317.

Aliende ida ne’e, FRETILIN mos kestiaona makas legalidade fundu rua, ne’ebe sei konsentra iha gabinete Primeiru Ministru nia hokos ho tokon 25 dollar Amerikanu no investimentu infraestrutura ho tokon 317.3 dollar Amerikanu katak kontra lei jestaun finanseiru no kontra Prinsipius konstituisaun RDTL ne’ebe komunga politika desentralizasaun.

Maibe idea ho opiniaun FRETILIN nian la konvense deputadu husi bloku AMP tamba realidade proposta OJE 2011 iha votasaun Jeneralidade liu ho votus maioria (43).

ENTERTANTU, Eis Primeiru Ministru atual Sekretariu Jeral FRETILIN, Marí Alkatiri hateten FRETILIN sei vota kontra ba orsamentu Geral Estadu 2011tamba konsidera inkonstituisional liliu ba fundu rua ne’ebe sei tau iha gabinete Primeiru Ministru nian.

“Ne’e inkonstituisional porque ne’e kontra konstitusional no lei jestaun finanseiru tamba kria fundu ne’e atu halo saida, Primeiru Ministru defaktu mak kuaze kontrola orsamentu tomak, entaun kompetensia Ministra Finansas nian mak saida,”deklara Alkatiri iha Parlamentu hafoin hasoru malu ho Bancada FRETILIN iha PN sexta (14/1).

Nia dehan kestaun refere kontra politika governu AMP rasik nebe hateten katak, planu governu maka atu implementa sistema desentralizasaun.

“Ne’e laos desentralizasaun maibe dezasgergasaun lei desentralizasaun iha ne’ebe? Laos iha lei orsamentu mak halo tuir nia hakarak,”kestiaona Alkatiri.

Maibe tuir eis Primeiru Ministru ne’e katak, lei osamentu tenki tuir lei sira seluk, tan ne’e Alkatiri dehan Governu laiha ona, iha mak Xanana Gusmao, tan ne’e diak liu governu ne’e rejigna an ona, maibe ba FRETILIN lakohi iha tan krize. Tamba ne’e hakarak ajuda hodi orsamentu ne’e aprova hodi la tama iha krize.

Sekretariu jeral FRETILIN akresenta, governu tau orsamentu bo’ot, maske laiha kapasidade, la sukat nia kapasidade, at liu estrutura osamentu moss ala ona.

“Sala tamba kuandu tau osan bo’ot iha capital dezenvolvimentu entaun tenki hatene ona saida mak tenki halo haneson luron metro hira inklui ponte hira, buat sira ne’e hotu tau iha osamentu,”esplika eis PM ne’e.

Ho situasaun ne’e hotu FRETILIN husu governu atu halo revizaun ba proposta refere, maibe Alkatiri dehan kuandu la simu FRETILIN sei vota kontra.

Konaba promesa atu halo milagre iha tinan ne’e, Alkatiri pesimista no kondena AMP katak ukun tinan tolu liu ona la halo buat ida maibe iha mak milagre korupsaun nian.

“Ukun tinan 3 deit la halo buat ida, agora atu remata mak foin halo milagre? Ne’e so Jesus Kristu, mas durante ne’e milagre koruptor mak iha,”dehan nia. (manuel da silva)