"PDN LA TABELE BÁ LIDERANSA RUMA"

Jornal Nacional Diário - Segunda 20 Dezembru 2010

Dili-“Prezidente Partidu Dezenvolvimentu Nasionál (PDN) Fernando Gusmão, deklara katak, partidu ne’ebé lidera la tabele bá lideransa ruma iha nasaun Timor Leste ne’e.

Deklarasaun ne’e fo sai husi Fernando Gusmão iha Sesta (17/12) relasiona ho informasaun ne’ebé espailha iha Públiku katak Prezidente Repúblika, José Ramos Horta, hamrik iha PDN nia kotuk.

Partidu ne’e deklara senti an ba deklarasaun husi Xefi Bancada FRETILIN, Aniceto Guterres ho Xefi Bancada PUN, Fernanda Borges, ba deskonfiansa katak funsionariu gabinete Prezidente Republika (GPR) uza sala osan redusaun pobreza ba interese partidu nian ninian.

Xefi Partidu ne’e mos rekonese katak, membru PDN balun servisu duni iha GPR nudar Asesor bá assuntu redusaun pobreza, maibe ninia parte haree katak intensaun husi deputadu nain 2 ne’e atu akuza no halo manobra foer hasoru PDN.

Fernando dehan, ninia parte la simu akuzasaun husi Xefi bancada FRETILIN no Xefi Bancada PUN ne’ebe hatete katak, PDN simu osan ruma husi GPR hodi halao atividade Partidu nian. Tuir Fernando akuzasaun ne’e laiha faktus no evidensia no bele prova duni katak PDN simu osan husi GPR.

“Akuzasaun ne’e hanesan manobra politika baratu ho intensaun atu hatu’un dignidade no naran diak PDN ne’ebe buras ba bebeik,”dehan Fernando Gusmão.

Nia dehan, PDB maske hanesan partidu foun, maibe nunka simu osan ruma husi Estadu hanesan ho Partidu sira seluk ne’ebe hetan asenta iha PN.

Fernando dehan, PDN kontinua firmeza iha ninia prinsipiu rasik katak, harii partidu tamba fiar ba ninia kapasidade rasik no la tabele ba lideransa ruma iha nasaun ne’e.

“Ami iha forsa rasik atu habo’ot ami nia partidu, Ami la tabele no sei la tabele ba sese deit,”haktuir Fernando.

Prezidente PDN ne’e hateten, lolos deputadu sir abele halo defirensia entre responsablidade individual no responsablidade instituisional.

Tamba nia dehan membru husi partidu hotu-hotu balun kaer mos kargu iha instituisaun astadu balun, maibe wainhira membru refere halo failansu ruma, labele akuza fali ninia partidu.

“Se iha faktus no evidensia ruma ne’ebe hatudu involvimentu membru partidu ruma hodi dezvia osan estadu favor lori ba tribunal,”dehan nia.

Nia dehan, PDN harii ho prinsipiu hakarak kuda fini diak hodi dezenvolve povu no nasaun Timor Leste, tan ne’e, PDN la tolera hahalok korupsaun.

Eis deputadu PSD ne’e dehan, PDN sempre hatudu nia respeita ba partidu sira seluk tan ne’e husu ba partidu seluk atu respeita malu hanesan amigo e laos inimigu.

Fernanda Borges

Iha fatin ketak Xefi Bancada PUN, Fernanda Borges hateten katak, diak liu PDN hapara ona atu uza ema nia naran hodi hadau votus.

“Tempu kampania seidauk to’o ida, diak liu para tia uza ema nia naran,”hatete deputadu ne’e.

Borges dehan, nudar reprezetante povu nia iha direitu atu koalia informasaun saida deit mak nia hetan husi baze.

Tan ne’e, nia hateten, se PDN senti la satisfas no senti sai vitima bele lori ba tribunal,”haruka sira lori ba tribunal,”dehan Borges.

Aniceto Guterres

Xefi bancada FRETILIN, Aniceto Guterres, dehan Bancada FRETILIN kestiaona osan ba redusaun pobreza iha GPR tamba iha informasaun balun hatete katak GPR halo deit uma ba ema husi Partidu ruma tamba ema balun ne’ebe toma konta ba osan refere nudar sekretariu Jeral partidu palun.

Nia dehan, Bancada FRETILIN lakohi atu osan ne’e mal-gastus no ema balun uja ba ninia interese poltika.

“Ami rona informasaun barak, aumenta tan ho relatoriu laiha, aumenta tan ho ami nia preokupasaun ida ne’e (uza ba interese privadu),”dehan Xefi bancada.

Xefi bancada ne’e hatutan, bancada FRETILIN la kestiaona interese PR Horta atu kombate kiak, maibe kestiaona deit responsablidade ba osan redusaun pobreza.jxn